নগৰ উন্নয়ন বিভাগৰ মন্ত্ৰী অতুল বৰাই কেৱল আশ্বাসেই দি আছে : মঞ্চৰ অভিযোগ

Please follow and like us:
0


অসমৰ বিভিন্ন নগৰ আৰু ইয়াৰ পাৰ্শ্বৱৰ্তী এলেকাৰ পৰিকল্পিত উন্নয়ন আৰু সুষম বিকাশৰ স্বাৰ্থত অসম নগৰ আৰু গাঁও পৰিকল্পনা আইন ১৯৫৯ ৰ আধাৰত ১৯৬৩ চনৰ পৰা প্ৰাধিকৰণৰ কাৰ্য্যালয়সমূহত চৰকাৰৰ দ্বাৰা নিয়োজিত সভাপতিসকলে কৰ্মচাৰীসকলক বিভিন্ন পদমর্যাদাৰে প্ৰাধিকৰণত নিযুক্তি দিছিল। কিন্তু সেইসকল কৰ্মচাৰী প্ৰায় ৪৫ মাহ ধৰি বঞ্চিত হৈ আছে প্ৰাপ্য বেতনৰ পৰা। সেয়েহে গণতান্ত্ৰিক আন্দোলনৰ হুংকাৰ দিছে সদৌ অসম উন্নয়ন প্ৰাধীকৰণ ঐক্য মঞ্চই।

গুৱাহাটী প্ৰেছ ক্লাৱত বুধবাৰে এক সংবাদমেল সম্বোধন কৰি এই হুংকাৰ দিয়ে মঞ্চৰ সভাপতি বাণীকান্ত বৰুৱাই।

উল্লেখযোগ্য যে মুঠ ২৪ টা প্ৰাধীকৰণত কৰ্মৰত প্ৰায় ৩৫০ গৰাকী শ্ৰমিক কৰ্মচাৰীয়ে বৃহৎ আৰ্থিক সংকটৰ সন্মুখীন হ’বলগীয়া হৈছে আৰু চৰম নিৰাপত্তাহীনতাত ভূগিছে। লগতে সুদীৰ্ঘকাল ধৰি অন্য চৰকাৰী কৰ্মচাৰীৰ দৰে সেৱা আগবঢ়াই অৱসৰ গ্ৰহণ কৰা আৰু কৰ্মৰত অৱস্থাত মৃত্যু হোৱা কৰ্মচাৰীসকলৰ পৰিয়ালৰ বাবে কোনোধৰণ পেন্স্যন, গ্ৰেচ্যুইটি, ভৱিষ্যতনিধিকে ধৰি আনুসাংগিক সা-সুবিধাৰ পৰা বঞ্চিত হৈ থকা বুলি মঞ্চৰ সভাপতিগৰাকীয়ে সংবাদমেলত উল্লেখ কৰে।

‘লখিমপুৰৰ কৰ্মচাৰীয়ে ৪৫ মাহ, দেৰগাঁৱৰ কৰ্মচাৰীয়ে ৩৫ মাহ, ডিব্ৰুগড়ৰ ২৮ মাহ, সোণাৰীৰ ২৬ মাহ, গোৱালপাৰাৰ ৩০ মাহ, কৰিমগঞ্জৰ ৮ মাহ, ধুবুৰীৰ ২২ মাহ, জাগীৰোডৰ ২০ মাহ, শিলচৰৰ ৫ মাহ, বৰপেটাৰ ২৩ মাহ, শিৱসাগৰৰ ২৮ মাহ, নাজিৰাৰ ২৭ মাহ, যোৰহাটৰ ৭ মাহ, তেজপুৰৰ ২ মাহ, কোকৰাঝাৰৰ ৩ মাহ, নলবাৰীৰ ১ মাহ, গোলাঘাটৰ ৫ মাহ, নগাঁৱৰ ৪ মাহ ধৰি দৰমহাৰ পৰা বঞ্চিত হৈ আছে।‘ এই অভিযোগ বৰুৱাৰ।

ইপিনে অনাগত সময়ছোৱাত বাকী প্ৰাধিকৰণসমূহো একেদৰেই প্ৰাপ্য দৰমহাৰ পৰা বঞ্চিত হ’ব বুলি আশংকা প্ৰকাশ কৰে বৰুৱাই।

আনহাতে বিভাগীয় মন্ত্ৰী অতুল বৰাক বাৰম্বাৰ সাক্ষাৎ কৰি তেওঁলোকৰ সমস্যাসমূহ সমাধান কৰিবৰ বাবে দাবী জনাই আহিছে যদিও মন্ত্ৰীগৰাকী কেৱল আশ্বাস দিয়াতে সীমাবদ্ধ থকা বুলিও তেওঁ অভিযোগ কৰে।

‘মন্ত্ৰী অতুল বৰাৰ সৈতে আমি বাৰম্বাৰ আমাৰ দাবীসমূহক লৈ আলোচনাত মিলিত হৈছো যদিও তেওঁ আমাৰ দাবীসমূহ পূৰণ কৰা হ’ব বুলিয়েই আশ্বাস দি আহিছে।‘ সংবাদমেলত বৰুৱাই এইদৰে কয়।

তেওঁ আৰু কয় ‘প্ৰাধিকৰণৰ কাৰ্য্যালয়ৰ আয়ৰ মূল উৎস মাটি বিক্ৰী, হস্তান্তৰ, গৃহ নিৰ্মাণৰ আপত্তি বিহীন প্ৰমাণ-পত্ৰ প্ৰদান কাৰ্যৰ বিপৰীতে সংগৃহীত হোৱা মাচুল সীমিত।‘

ইয়াৰোপৰি, কৰ্মচাৰীসকলৰ অপ্ৰাদেশীকৃত চাকৰি প্ৰাদেশীকৰণকে ধৰি চাকৰিৰ নিৰাপত্তা, অনিশ্চিত দৰমহা, অৱসৰৰ পাছত আৰু কৰ্মৰত অৱস্থাত মৃত্যু হোৱা কৰ্মচাৰীৰ পৰিয়ালক পেন্সন, গ্ৰেছুইটি আৰু ভৱিষ্যনিধি আদি প্ৰদান কৰিবৰ বাবে নগৰ উন্নয়ন বিভাগৰ মন্ত্ৰী আৰু বিত্ত বিভাগৰ মন্ত্ৰীক দাবী জনায়।



Source link

Please follow and like us:
0

Leave a Reply

Your email address will not be published. Required fields are marked *