প্ৰধানমন্ত্ৰীক সাক্ষাৎ সোণোৱালৰ; স্মাৰকপত্ৰ যোগে কাছাৰ আৰু নগাঁও কাগজ কল পুনৰুজ্জীৱিত কৰাৰ বাবে আহ্বান

Please follow and like us:
0


নিৰংকুশ সংখ্যাগৰিষ্ঠতাৰে দ্বিতীয় বাৰৰ বাবে প্ৰধানমন্ত্ৰীৰ পদত অধিস্থিত হোৱাৰ পাছত নৰেন্দ্ৰ মোদীক প্ৰথম বাৰৰ বাবে সাক্ষাৎ কৰে অসমৰ মুখ্য মন্ত্ৰী সৰ্বানন্দ সোণোৱালে।

নতুন দিল্লীৰ প্ৰধানমন্ত্ৰীৰ চৰকাৰী বাসগৃহত অনুষ্ঠিত সাক্ষাৎ কালত সোণোৱালে প্ৰধানমন্ত্ৰীগৰাকীৰ সৈতে অসমৰ বিভিন্ন সমস্যাসমূহৰ বিষয়ে আলোচনা কৰাৰ লগতে সমস্যাসমূহ সমাধানৰ বাবে পূৰ্বৰ দৰে সহায়-সহযোগিতা কামনা কৰে।

মুখ্য মন্ত্ৰী সোণোৱালে আলোচনাৰ সময়ত ৰাজ্যৰ বিভিন্ন সমস্যা আৰু ইয়াৰ সমাধানৰ বাবে প্ৰধান মন্ত্ৰীক এখন স্মাৰক পত্ৰ প্ৰদান কৰে।

সোণোৱালে প্ৰদান কৰা স্মাৰক পত্ৰত অসমৰ বান আৰু গৰাখহনীয়া সমস্যা আৰু নগাঁও আৰু কাছাৰ কাগজ কলৰ প্ৰসংগই মুখ্য স্থান পাই।

স্মাৰক পত্ৰত সোণোৱালে অসমৰ গৰাখহনীয়া সমস্যাক এছ ডি আৰ এফৰ গাইড লাইনত প্ৰাকৃতিক দুৰ্যোগ হিচাপে অন্তৰ্ভূক্ত কৰিবলৈ আৰু অসমৰ দৰে ৰাজ্যসমূহত সঘনাই ঘটি থকা ধুমুহা আৰু বজ্ৰপাতৰ ঘটনাকো প্ৰাকৃতিক দুৰ্যোগৰ তালিকাত অন্তৰ্ভূক্ত কৰিবলৈ আহ্বান জনায়।

আনহাতে, মুখ্য মন্ত্ৰীয়ে বান প্ৰতিৰোধ, বানপানীৰ বাবে প্ৰস্তুতি, নিৰাময়, পুনৰ নিৰ্মাণ ইত্যাদি দিশ সমূহকো দুৰ্যোগ ব্যৱস্থাপনাৰ আওতালৈ অনাৰ বাবে আহ্বান জনায় যাতে ইয়াৰ অধীনত পৰ্যাপ্ত পুঁজি আগবঢ়াব পৰা যায়।

লগতে এছ ডি আৰ এফৰ অনুদান আৰ্হি বৰ্তমানৰ ৯০ : ১০ পৰিবৰ্তে কেন্দ্ৰীয় চৰকাৰৰ পৰা ১০০ শতাংশ সাহায্য অনুদান হিচাপে ৰূপায়ণ কৰাৰ বাবেও মুখ্য মন্ত্ৰীয়ে আহ্বান জনায়।

উল্লেখযোগ্য যে, স্মাৰক পত্ৰখনত মুখ্য মন্ত্ৰীয়ে নগাঁও আৰু কাছাৰ কাগজ কল দুটা পুনৰুজ্জীৱিতকৰণৰ বাবে গুৰু উদ্যোগ বিভাগে প্ৰস্তুত কৰা পুনৰুজ্জীৱিতকৰণৰ প্ৰস্তাৱ কেন্দ্ৰীয় কেবিনেটত উত্থাপন কৰাৰ জৰিয়তে কাগজ কল দুটা পুনৰুজ্জীৱিতকৰণৰ ব্যৱস্থা ল’বলৈ প্ৰধানমন্ত্ৰীক আহ্বান জনায়।

আকৌ, প্ৰধান মন্ত্ৰী আৱাস যোজনা-গ্ৰামীণৰ অধীনত যোগ্যতাসম্পন্ন ৰাজ্যখনৰ বাদ পৰি যোৱা হিতাধিকাৰীসকলকো এই যোজনাখনৰ স্থায়ী ৱেটিং লিষ্টত অন্তৰ্ভূক্ত কৰাৰ বাবে প্ৰধানমন্ত্ৰীক ব্যৱস্থা কৰিবলৈ আহ্বান জনায় যাতে এই সকল হিতাধিকাৰীয়েও নিৰাপদ পকীঘৰ লাভ কৰিব পাৰে।

মুখ্য মন্ত্ৰী সোণোৱালে অৰ্পন কৰা স্মাৰকপত্ৰত তাৰোপৰি ঔদ্যোগিক বিনিয়োগ, নগৰ উন্নয়ণ, মীন, পথ আৰু দলং, পৰ্যটন, স্বাস্থ্য, শক্তি, জলসম্পদ ইত্যাদি খণ্ডত ৰূপায়ণ কৰিবলগীয়া প্ৰকল্পত কেন্দ্ৰীয় চৰকাৰৰ পৰা অধিক পৰিমাণৰ পূজি আশা কৰে।

প্ৰধান মন্ত্ৰী নৰেন্দ্ৰ মোদীয়ে সৰ্বানন্দ সোণোৱালক সকলো সমস্যা সমাধান কৰাৰ আশ্বাস দিয়ে বুলি সোণোৱালে মত প্ৰকাশ কৰে।



Source link

Please follow and like us:
0

Leave a Reply

Your email address will not be published. Required fields are marked *