বাংলাদেশ কঠোৰ হোৱাৰ বিপৰীতে অসমত ফাইলতে সীমাবদ্ধ নিৰ্দেশনা

Please follow and like us:
0


অসম চৰকাৰে বৰ্তমান সময়ছোৱাত মাছ ধৰাৰ ক্ষেত্ৰত কিছু নিৰ্দেশনা দি এক জাননী জাৰি কৰিছিল যদিও বাস্তৱত তাৰ সম্পূৰ্ণ বিপৰীত ছবিহে প্ৰতিফলিত হৈছে। মাছৰ প্ৰজননৰ সময়ছোৱাত এয়া মীন সঞ্চালকালয়ৰ এটা ৰীতিগত নিৰ্দেশ হিচাপেহে পৰিগণিত হৈছে।

চলিত বৰ্ষতো অসমৰ মীন বিভাগে অসমৰ বিশেষকৈ বৰপেটা, কাছাৰ, হাইলাকান্দি, ডিব্ৰুগড়, তিনচুকীয়া, শিৱসাগৰ, যোৰহাট, গোলাঘাট, শোণিতপুৰ, লখিমপুৰ, ধেমাজি, নগাঁও, মৰিগাঁও, কামৰূপ, নলবাৰী, বঙাইগাঁও, কাৰ্বি আংলং, ডিমা হাচাও, ওদালগুৰি, চিৰাং, ধুবুৰী, গোৱালপাৰা, দৰং, বাক্সা, কোকৰাঝাৰ আৰু কৰিমগঞ্জৰ জিলা মীন উন্নয়ন বিষয়াসকললৈ নিৰ্দেশনা জাৰি কৰিছিল।

অসম মীন অধিনিয়ম,১৯৫৩ৰ অধীনত জাৰি কৰা নিৰ্দেশনা অনুসৰি মাছৰ প্ৰজননৰ এই সময়ছোৱাত ৭/১৪ ছে: মি:ৰ তলৰ বৰজাল/মহাজাল বা ফাঁচিজাল ব্যৱহাৰ কৰাত নিষেধাজ্ঞা আৰোপ কৰা হৈছে।

তদুপৰি, যিকোনো পুখুৰীতে কণী দিবলগীয়া নিৰ্দিষ্ট প্ৰজাতিৰ মাছ ধৰাত নিষেধাজ্ঞা আৰোপ কৰা হৈছে। ইয়াৰ লগতে এই সময়ছোৱাত কিছুমান প্ৰজাতিৰ নিৰ্দিষ্ট আকৃতিৰ তলৰ মাছ খোৱাৰ বাবে বা বিক্ৰীৰ বাবে যিকোনো পদ্ধতিৰে ধৰা বা মৰাত নিষেধাজ্ঞা জাৰি কৰা আছে।

সকলোবোৰ পুখুৰী তথা প্ৰাকৃতিক জলাশয়ত মাছৰ স্বাভাৱিক প্ৰজনন, বংশ বৃদ্ধি আৰু বিকাশৰ প্ৰতি লক্ষ্য ৰাখি এই নিষেধাজ্ঞা আৰোপ কৰা হৈছে।

অৱশ্যে, এই সকলোবোৰ এতিয়া পাইলতে আৱদ্ধ আছে আৰু প্ৰতিবছৰে ৰাজ্যখনৰ চূকে-কোণে ব্যাপক ৰূপত মাছ ধৰা বা মাছমৰা কাৰ্য চলিয়েই আছে।

চৌপাশে দেখা পোৱা ইয়াৰ ছবিখনে প্ৰকৃত দিশটো উন্মোচন কৰে। ৰাজ্যখনৰ বিভিন্ন স্থানীয় বজাৰসমূহত তথা অস্থায়ী দোকানবোৰত প্ৰশাসনৰ জ্ঞাতসাৰেই প্ৰজননৰ সময়ছোৱাত কণীযুক্ত মাছৰ বিক্ৰী সুলভ ৰূপত হৈ আছে।

কিন্তু ইয়াৰ বিপৰীতে, চুবুৰীয়া দেশ বাংলাদেশে মাছৰ প্ৰজনন নিশ্চিত কৰাৰ বাবে কঠোৰ ব্যৱস্থা গ্ৰহণ কৰিছে। বাংলাদেশে বিলুপ্ত প্ৰায় মাছৰ বংশবৃদ্ধি আৰু বিকাশৰ লক্ষ্য সন্মুখত ৰাখি চলিত মাহৰ ২০মে’ৰ পৰা অহা ২৩ জুলাইলৈ ৫৬ দিনৰ বাবে ইয়াৰ উপকূল অঞ্চলত মাছধৰা নিষিদ্ধ কৰিছে।

উক্ত সময়ছোৱাৰ ভিতৰত সকলো ধৰণৰ মাছধৰা সঁজুলি নিষিদ্ধ কৰা হৈছে আৰু উপকূল আৰক্ষীক বিশেষভাৱে বঙ্গোপসাগৰ অঞ্চলত কঠোৰভাৱে বলবৎ কৰাৰ নিৰ্দেশ দিছে।

বাংলাদেশ মাছ ৰপ্তানিৰ ক্ষেত্ৰত, বিশেষকৈ সকলো মাছৰ ৰজা – ইলিছ ৰপ্তানিৰ ক্ষেত্ৰত পৰিচিত।

এটা সময় আছিল যেতিয়া বঙ্গোপসাগৰত প্ৰজননৰ পাছত পদ্মা নদীৰ বিখ্যাত ইলিছ মাছ আনকি উজাই অসমলৈ- বিশেষকৈ মৰিগাঁও আৰু মঙলদৈলৈকো আহিছিল। কিন্তু কেইবছৰ ধৰি অত্যধিক মাছধৰাৰ ফলত বাংলাদেশত ইলিছ মাছৰ উৎপাদন সাংঘাতিকভাৱে হ্ৰাস পাইছে।

চুবুৰীয়া দেশখনত পূৰ্বতে বাণিজ্যিকভাৱে মাছধৰাৰ ওপৰত হ্ৰস্বকালীন নিষেধাজ্ঞা আছিল, কিন্তু এইবাৰ প্ৰথমবাৰৰ বাবে স্থানীয় মাছমৰীয়াসকলকে ধৰি সকলোবোৰ মাছধৰা নাও এক দীৰ্ঘকালীন সময়ৰ বাবে নিষিদ্ধ কৰা হৈছে।

অসম চৰকাৰেও মাছৰ প্ৰজননৰ সময়ছোৱাত মাছ ধৰাত নিষেধাজ্ঞা আৰোপ কৰাৰ কঠোৰ পদক্ষেপ গ্ৰহণ কৰাৰ সময় আহি পৰিছে যাতে বাস্তৱিকতে ৰাজ্যখনত স্থানীয় বিভিন্ন প্ৰজাতিৰ মাছসমূহ ৰক্ষা কৰিব পৰা যায়।



Source link

Please follow and like us:
0

Leave a Reply

Your email address will not be published. Required fields are marked *