২২ জুনৰ পৰা কামাখ্যাত মহা অম্বুবাচী, ব্যাপক প্ৰস্তুতি

Please follow and like us:
0


সমাগত শক্তিপীঠ কামাখ্যাৰ অম্বুবাচী মেলা। অহা ২২ জুনৰ পৰা ২৬ জুনলৈ কামাখ্যা দেৱোত্তৰৰ অম্বুবাচী মেলাৰ বাবে প্ৰস্তুতি এতিয়া পূৰ্ণোদ্যমে চলিছে। এইবাৰ মেলা উপলক্ষে ভক্তৰ সংখ্যাও প্ৰায় ২০ শতাংশ বৃদ্ধি পাব বুলি ধাৰণা কৰিছে অসম পৰ্য্যটন উন্নয়ন নিগমে।

বুধবাৰে গুৱাহাটীস্থ নিগমৰ মুখ্য কাৰ্য্যালয়ত সংবাদমেল অনুষ্ঠিত কৰি মেলাৰ প্ৰস্তুতি সম্পৰ্কে জানিবলৈ দিয়ে অসম পৰ্য্যটন উন্নয়ন নিগমৰ অধ্যক্ষ জয়ন্তমল্ল বৰুৱাই।

বৰুৱাই জানিবলৈ দিয়া মতে এইবাৰ অম্বুবাসী মেলাত যোৱাবাৰতকৈ ভক্তৰ আগমনৰ সংখ্য যথেষ্ঠখিনি বৃদ্ধি পাব। যোৱাবাৰ প্ৰায় ২০ লাখ ভক্তই কামাখ্যা ধামত সমাগম কৰিছিল আৰু এইবাৰ এই সংখ্যা ২৫ লাখলৈ বৃদ্ধি পোৱাৰ পূৰ্ণ সম্ভাৱনা ব্যক্ত কৰে অধ্যক্ষগৰাকীয়ে।

উত্তৰ-পূবৰ লগতে দেশ-বিদেশৰ পৰা অহা ভক্তসকল থকাৰ বাবে পৰ্য্যটন উন্নয়ন নিগমে চাৰিটা স্থানত শিবিৰ সাজু কৰা বুলি বৰুৱাই জানিবলৈ দিয়ে। সেই স্থানকেইটা ক্ৰমে ফাঁচী বজাৰৰ পুৰণি কাৰাগাৰ চৌহদ, বৰিপাৰা, পাণ্ডু ষ্টে’চন আৰু নাহৰবাৰী। পূৰ্বতকৈ এইবাৰ শিবিৰৰ সংখ্যা হ্ৰাস কৰা হৈছে কিন্তু একোটা শিবিৰত অধিক লোক থাকিব পৰা ব্যৱস্থা কৰা হৈছে বুলিও তেওঁ জানিবলৈ দিয়ে।

২১ জুনৰ বিয়লি ৪ বজাত ভৰলুমুখৰ সোণাৰাম খেলপথাৰত অম্বুবাচী মেলাৰ শুভাৰম্ভণি অনুষ্ঠান অনুষ্ঠিত হ’ব। ইয়াত অসমৰ মুখ্য মন্ত্ৰী সৰ্বানন্দ সোণোৱাল, কেন্দ্ৰীয় পৰ্য্যটন মন্ত্ৰী প্ৰহ্লাদ সিং পেটেল, বিত্ত মন্ত্ৰী হিমন্ত বিশ্ব শৰ্মা আৰু অসমৰ পৰ্য্যটন মন্ত্ৰী চন্দন ব্ৰহ্ম উপস্থিত থাকিব। সেইদিনাই সন্ধিয়া তাত অনুষ্ঠিত হ’বলগীয়া সাংস্কৃতিক অনুষ্ঠানত বলিউদৰ জনপ্ৰিয় শিল্পী কৈলাশ খেৰ উপস্থিত থাকিব বুলি জানিবলৈ দিয়ে।

অম্বুবাচী মেলা উপলক্ষে কামাখ্যা জংচনত এটা তথ্য কেন্দ্ৰ স্থাপন কৰাৰ কথাও অসম পৰ্য্যটন উন্নয়ন নিগমৰ অধ্যক্ষগৰাকীয়ে প্ৰকাশ কৰে। একেদৰে মেলাৰ প্ৰচাৰৰ বাবে নতুন দিল্লী আৰু ক’লকাতাৰ বিমান বন্দৰতো হ’ৰ্ডিং আৰু ডিজিটেল স্ক্ৰীনিঙৰ ব্যৱস্থা কৰা বুলি তেওঁ প্ৰকাশ কৰে। দেশৰ কেইবাখনো ৰাজ্যৰ মুখ্য চহৰসমূহত মেলাৰ প্ৰচাৰৰ বাবে হ’ৰ্ডিং অঁৰাৰ উপৰিও কেইবাটাও আঞ্চলিক ভাষাৰ টেলিভিজন আৰু ৰেডিঅ’ চেনেলত বিজ্ঞাপন প্ৰকাশ কৰা বুলিও জয়ন্তমল্ল বৰুৱাই কয়।

ভক্তৰ অধিক হাৰত হোৱা ভিৰৰ বাবে কামাখ্যা ধামলৈ মেলাৰ দিনকেইটাত যান-বাহনৰ চলাচল প্ৰশাসনে নিষিদ্ধ কৰিছে। অৱশ্যে প্ৰতিবন্ধী, জ্যেষ্ঠ নাগৰিক, ছাত্ৰ্ৰ-ছাত্ৰীৰ বাবে প্ৰশাসনৰ তৰফৰ পৰা ব্যৱস্থা কৰা অসম ৰাজ্যিক পৰিবহণ নিগমৰ বাহনসমূহ চলাচল কৰিব বুলি অসম পৰ্য্যটন উন্নয়ন নিগমে জানিবলৈ দিয়ে।

নিগমে লগতে কামাখ্যালৈ গাড়ী যোৱা পথৰ উপৰিও, মেখেলা উজোৱা পথকে ধৰি মুঠ চাৰিটা পথেৰে ভক্তসকলে খোজকাঢ়ি ওপৰলৈ যাব পাৰিব বুলিও প্ৰকাশ কৰে। আটাইকেইটা পথতে খোৱাপানী আৰু জোতা-চেণ্ডেল ৰখাৰ লগতে পৰ্য্যাপ্ত পোহৰৰ ব্যৱস্থা থাকিব বুলিও কয়।

অম্বুবাচী মেলাৰ বাবে আৰক্ষী প্ৰশাসনে নিৰাপত্তাৰ দিশটো চোৱাৰ লগতে জনস্বাস্থ্য কাৰিকৰী, গড়কাপ্তানী বিভাগ পৌৰ নিগম আদিকে সংশ্লিষ্ট বিভাগসমূহ সাজু হোৱা বুলিও নিগমৰ অধ্যক্ষগৰাকীয়ে সংবাদ মেলত জানিবলৈ দিয়ে। মেলাৰ দিনকেইটাৰ বাবে অসম চৰকাৰে বেনাৰস আৰু ক’লকাতাৰ পৰা বিশেষ ৰে’লৰ ব্যৱস্থা কৰিবলৈ ৰে’ল বিভাগক অনুৰোধ জনোৱা বুলিও তেওঁ জানিবলৈ দিয়ে।

মেলাৰ সময়ত শক্তিপীঠলৈ অহা ভক্তই উমানন্দ দৰ্শন কৰাৰ বাবে সোণেশ্বৰ খেলপথাৰৰ সমীপৰ পৰা অভ্যন্তৰীণ জল পৰিবহণ বিভাগে বিশেষ ফে’ৰিৰ ব্যৱস্থা কৰিব বুলিও জয়ন্ত মল্ল বৰুৱাই সংবাদমেলত প্ৰকাশ কৰে।



Source link

Please follow and like us:
0

Leave a Reply

Your email address will not be published. Required fields are marked *